ஓரம் போ ஓரம் போ

நான் சென்னை சாலைகளில் வண்டி ஓட்டி ரொம்ப நாள் ஆகிப்போச்சு. 

கிட்டத்தட்ட ஒரு 4 வருஷம்னு வச்சுக்கலாம்... ( ஐய் நாலு வருஷமா சாலை விபத்துக்கள் அதான் குறைஞ்சு  போச்சுன்னு  சொல்றீங்களோ?? )

அதுக்குன்னு ரொம்ப மோசமா எல்லாம் வண்டி ஓட்ட மாட்டேன்..( சொல்லிக்க வேண்டியதுதான் ) 

இன்னைக்கு ஒரு வேலையா ( நம்பிட்டோம் ) என் மாமாவோட வண்டி எடுத்துக்கிட்டு கொஞ்சம் ஊர் சுத்தினேன் ...

அப்படியே மனசுக்குள் கொசுவத்தி சுத்திச்சு...எல்லாரும் எப்படி வண்டி கத்துப்பாங்களோ தெரியாது...நன் கத்துக்கிட்டது ஒரே ஒரு ராத்திரியில் தான்....அப்போ நான் பத்தாம் வகுப்பு படிச்சுட்டு இருந்தேன். என் அப்பாவின் நண்பர் ஒருவர் வண்டி ஓட்ட சொல்லித்தரேன்னு வண்டியை ஸ்டார்ட் செய்து கொடுத்தார், நேரா வண்டி மேல உட்க்கார கூடாது...கொஞ்சமா accelerate பண்ணு ஆனா பிரேக் பிடி, கூடவே ஓடு..என்றார்.

 

நானும் ஒரு ஆறுதரம் தெருமுனை வரை வண்டிகூடவே ஓடி பின்பு உட்கார்ந்து  ஒரு 2  ரவுண்டு ஓட்டினேன்..

ஒருவரால் ஒரே இரவில் ஒருவருக்கு வண்டி ஓட்ட கத்துக்கொடுக்க முடியுமான்னு தெரியல..ஆனா அவர் சொல்லித்தந்தார்..அவர் இப்போ எங்கே இருக்காரோ..ஆனா என்னைப்போல் ஒரு தமாஷான ஆளுக்கு வண்டி சொல்லித்தந்து புண்ணியம் கட்டிகொண்டார்.

இந்த கூத்து நடந்து ஒருமாதம் கூட ஆகவில்லை. இதுல என் தோழியையும் ஏற்றிக்கொண்டு நாங்க ஒரு பட்டாளம் பீச் போக முடிவு செய்தோம்! 

அம்மாவிடம் படிக்க போறேன் மா என்று பொய் சொல்லி விட்டு கிளம்பினேன்.  என் பின்னால்(தைரியமாக உட்கார ஒரு தோழி முன்வந்தார் ( பாவம் ). கிளம்பினோம்..எல்லாம் ஒழுங்காத்தான் போய்கிட்டிருந்துச்சு....நம்ம அடையார் மத்ய கைலாஷ்கிட்ட ( போறது நம்ம பெசன்ட் நகர் பீச் )  போய்கிட்டு இருந்தோம்..

எங்கேந்துதான் வந்தாரோன்னு தெரியல..ஒரு டிராபிக் போலீஸ் வந்து நடுல நின்னுட்டார்....கையை நீட்டிய படியே..( அடக்கடவுளே என் கிட்ட எல் எல் ஆர் கூட இல்லாத விஷயம் யாராவது சொல்லியிருப்பான்களோ ?? இன்சூரன்ஸ் ஆர் சி புக் போன்றவைகள் என்னவென்றே எனக்கு தெரியாது..ஆகமொத்தம் வண்டிக்கு தேவையான ஆவணங்கள் என்னிடம் எதுவுமே இல்ல ) அது மழை பெய்து ஓய்ந்த நேரம் ..ரோடெலாம் ஈரமாக இருந்தது..

 

க்ரீச்ச்ச்ச்ச்ச்ச்ச்ச்ச்ச்...என்று பலத்த ஆரவாரத்தோட வண்டிய நிறுத்த ...

உடனே வண்டி லேசாகிப்போனது..என்ன வென்றே புரியாமல் நான் விழிக்க...

பின்னாலிருந்து அம்மா என்று ஒரு குரல்..அனைவரும் பதட்டத்தோடு ஏதேதோ கத்த...என்னவென்று திரும்பினா....அவ்வ்வ்வவ்வ்வ்வவ் 

என் தோழி கீழே விழுந்துருக்கா...நான் போட்ட பிரேக் அப்படி...எழுந்து வந்து ஒரே குட்டு நடு மண்டைல...திட்டிக்கொண்டே பின்னால் அமர்ந்து கொண்டாள்.

இதை சற்றும் எதிர்பாராத அந்த போலீஸ் காரர் " என்னம்மா இப்படி பிரேக் போடறே..பரவால்லன்னு போயிருக்கலாம் இல்ல பொறுமையா நிறுத்திருக்கலாம் ...ஏன் இப்படி? ஏதாவது ஆனா யார் பாடல் பதில் சொல்றதுன்னு " 

அவ்ளோ பொறுமையாக சொல்லி விட்டு போனார். ..

 பீச் போனதும் அந்த தோழி என்னை விரட்டி விரட்டி அடித்தது  தனி கதை...

மீதி நிகழ்வுகளை அடுத்த பதிவில் போடறேன் ( ஐயோ இன்னும் ஒன்னா ??? )